Fergus Kennedy: Небото не е граница со Canon Log

Новиот проект на Fergus е лично негов, што му дава слобода да ги реализира своите идеи. Тој и неговиот брат Nick, кој беше операторот на камерата, сакаа да ги поместат границите и да видат што можат да постигнат. Fergus сфати дека надградбата на Canon Log на EOS 5D Mark IV ќе претставува огромна придобивка при предизвикувачките услови на снимањето со дронови. Canon Log ја нуди можноста да се долови повеќе од динамичкиот опсег од сензорот, што може да се искористи при градацијата во обработката по снимањето за да се постигне специфичен изглед и да се надополнат снимките од различни камери. Таа е големо олеснување кое сега е норма за професионалните кинематографи, а со тоа што е присутна на EOS 5D Mark IV ја прави сериозна дигитална алатка за снимање. 

„Во минатото ја користев XC10 од Canon за дронско снимање во 4K,“ објаснува Fergus. „Беше многу добра, лесна камера. Но, EOS 5D Mark IV исто така снима слики во висока резолуција и ги користи придобивките од одличниот и широк избор на EF објективи, така што нејзиниот опсег на користење е поголем. Сакавме да направиме видеозапис со динамични спортови користејќи соодветни парчиња, што значеше дека ни требаше најдобар квалитет и флексибилност на градацијата при обработката по снимањето. Со Canon Log при рака, EOS 5D Mark IV можеше да ни го овозможи тоа.“

„EOS 5D Mark IV е многу способна видеокамера која нуди 4K, а сега и Canon Log со услуга за надградба на фирмверот,“ додава Fergus. „Можевме да ја искористиме C300 Mark II – таа ќе можеше да се постави на нашите дронови. Сепак, EOS 5D Mark IV е полесна, така што можевме да го зголемиме времето на летање.“

Совладување на пречките

Fergus се соочил со неколку предизвици во овој проект. Како прво, совпаѓањето на снимките од различните активности на различни локации е проблематично. Ова е тешко да се постигне кога се работи за динамично движење, но уште повеќе затоа што дронот го летале низ густа шума.

Еден од најголемите предизвици се појавил при снимањето на еден сурфер со летечки змеј во акција. „Тоа ни беше петти лет,“ објаснува Fergus. „Дронот се наоѓаше на околу 5m височина и беше околу 200m навлезен во морето кога снема напојување, но не целосно. Не реагираше кога го поместив копчето нагоре, па потона бавно во водата, а ние веќе не го видовме.“ Fergus мисли дека дефектот бил кај главната батерија за летот. За среќа, имале осигурување и за кратко време повторно летале. „Новиот дрон има шест батерии наместо една,“ додава Fergus. „Така што, ако се јави дефект кај една батерија сега, нема да падне!“

„За ова снимање беше потребна внимателна оркестрација на активностите на три луѓе – пилотот на дронот, операторот на камерата и спортистот кој го снимавме,“ продолжува Fergus. „Сите тројца мораа добро да го темпираат времето, што беше незгодно – секоја снимка ја повторуваме по 20 пати за совршено да ја доловиме акцијата.“ Сигурноста и флексибилноста на EOS 5D Mark IV се покажаа од непроценлива вредност, давајќи им ја на Fergus и на неговиот тим довербата дека секоја снимка којашто ја изработила триото била прекрасно доловена од камерата.

„Условите на осветлување претставуваа многу потенцијални потешкотии,” додава Fergus. „Шумата беше ишарана со длабоки сенки и многу светли делови. Над земјата, на релативно светло небо, тлото е под сенка, така што треба да навлезете во сенките без премногу да ги осветлите светлите делови. Преку морето има многу точки што рефлектираат силна светлина. Ова е значителен товар за динамичкиот опсег, маргината на грешка и кодекот на камерата, затоа што одредена експозиција може да функционира добро за светлите области, но не и за сенките и обратно. Ако снимате фотографии, со ова можете да се справите со снимање на RAW. Но, кога снимате видеозапис, потребна ви е најголема можна маргина на грешка за да ги направите динамичните делови поатрактивни во обработката по снимањето. Токму тука Canon Log на EOS 5D Mark IV беше од голема полза, бидејќи ви ја овозможува таа маргина на грешка.“