Проекти за снимање забрзани движења за почетници

Снимањето видеоснимки со забрзани движења е креативна техника што ви овозможува да откриете скриен свет во движење и техника со која може да добиете изненадувачки и задоволителни резултати. Од забрзување на темни облаци што минуваат врз некое поле па сè до снимање на бавниот марш на ѕвездите по ноќното небо, снимањето видеоснимки со забрзани движења е совршено за големи површини - но, сепак е техника што е еднакво ефикасно и за помали предмети во домот.

За да ви покажеме дека не треба да патувате далеку за да бидете креативни, предизвикавме два фотографи за видеоснимки со забрзани движења да снимат нешто прекрасно во рамките на нивниот дом.

Alex Nail е наградуван фотограф за пејзажи и видеоснимки со забрзани движења од Обединетото Кралство. Неговата страст е да доловува реални пејзажи и освен тоа што гради импресивно портфолио од проекти со видеоснимки со забрзани движења, тој ја има користено оваа техника за изработка на реклами за многубројни организации, вклучувајќи ја и организацијата British Tourist Authority.

Иако Alex вообичаено фотографира на европските планински вериги, тој вели дека фотографирањето во близина на домот е одличен начин за да се запознаете со техниката за снимање забрзани движења. Тој сними видеоснимка со забрзани движења од преодот од ден во ноќ преку еден од прозорците во неговиот дом за да покаже колку лесно може да се направи.

„Домот е совршено место за да ја научите техниката за снимање забрзани движења бидејќи е многу практично и условите се контролирани“ - објаснува Alex. „Кога сте на отворено, снимањето забрзани движења може да биде малку потешко, особено при силен ветар, дожд или неочекувани промени на светлината. Но, затоа можете лесно да ја совладате техниката за снимање забрзани движења во вашиот дом. Дури и сега, и покрај моето осум годишно искуство за снимање забрзани движења, јас сè уште почнувам со тестирање на условите во просторијата.

„И фотографирањето во затворени простории може да ви зададе одредени предизвици. Домовите се воглавно статички места, па затоа како фотограф имате предизвик да размислите како да внесете промени или движења во сцената. Исто така, можно е да не живеете во раскошна куќа (јас секако не живеам во таква куќа), но тоа не треба да ве спречи да ги доловите движењата од секојдневниот живот или да се фокусирате на малите детали. Ако фотографирате за време на зајдисонце или изгрејсонце, размислете како вештачкото осветлување во просторијата би се променило (или не) во споредба со значителните промени надвор“.

Alex предлага употреба на стационарни предмети како контраст на движењата што сакате да ги доловите. „На пример, може да создадете контраст на статичката природа на рамката на прозорецот и украсите со непредвидените движења на дрвјата надвор што ги дува ветерот или, пак, со облаците што се движат по хоризонтот. Статичките елементи го насочуваат вниманието на гледачот кон движењата во сцената“.

Откако дипломираше на факултетот за уметност и дизајн Central Saint Martins во Лондон, Camilla Rutherford од Шкотска избега од градскиот живот за да фотографира и снима спортисти за авантуристички спортови „следејќи го снегот низ целиот свет“. По одреден период почна да живее во Ванака во Нов Зеланд, на фарма за мерино овци заедно со нејзиното семејство.

Видеоснимките со забрзани движења на Camilla го доловуваат движењето на стадото овци по нејзината фарма. Контрастот помеѓу брзото темпо на хранење на животните и бавното движење на облаците создава визуелен контраст, а квалитетот на осветлената и прекрасна заднина создава филмски изглед на оваа обична сцена.

И покрај тоа што можеби немате ваква убавина на вашиот праг, оваа техника е подеднакво добра за снимање на секојдневните активности на вашето домашно милениче во вашата соба или на птиците што ја посетуваат хранилка за птици во градината. Ставете го фотоапаратот на статив, поставете долг интервал за снимање забрзани движења и доловете го секојдневното движење на животните што вообичаено не би го забележале.

Значи, се уверивте колку ефикасно може да биде снимањето забрзани движења во мал размер. Исто така, не ви треба напреден фотоапарат или специјален објектив. Ако имате многу слободно време и многу трпение, тогаш снимете серија слики во исти интервали и потоа спојте ги сликите со помош на софтвер за уредување видео за да создадете видеоснимка со забрзани движења.

За да ви ја олеснат работата уште повеќе, голем број фотоапарати EOS од Canon имаат вграден тајмер со интервали што ќе го автоматизира целиот процес. Користејќи ја оваа опција, може да одредите колку слики сакате да снимите и колку долг да биде интервалот помеѓу снимањето на сликите - во секунди, минути или часови. Потоа фотоапаратот ќе почне да ја снима низата слики со однапред поставените интервали сè додека не го сними потребниот број на слики што сте го одредиле претходно. Оваа група слики потоа може да се искористи за создавање видеоснимка со забрзани движења со помош на соодветен софтвер, а сликите поединечно може да се искористат на други креативни начини.

Некои EOS-фотоапарати нудат опција за видеоснимки со забрзани движења, овозможувајќи неверојатно практично одвивање на процесот. Оваа опција ја врши сета напорна работа, односно ги спојува сликите во самиот фотоапарат и ја зачувува конечната видеоснимка со забрзани движења во мемориската картичка, за да можете веднаш да ја репродуцирате и споделувате.

Голем број фотоапарати од серијата EOS нудат најмалку една од овие опции, а понекогаш и двете опции. EOS 250D и EOS RP се два фотоапарати наменети за почетници што ќе ви овозможат да го истражувате креативниот свет на видеоснимките со забрзани движења во вашиот дом. Од цветање и овенување на цвеќињата па сè до топење на сладоледот и движењето на сончевата светлина во вашата дневна соба, имате неограничен број на субјекти што може да ги претворите во прекрасни видеоснимки со забрзани движења.

Штом изберете соодветен субјект за вашата видеоснимка со забрзани движења, време е да го поставите фотоапаратот. Во овој случај се препорачува да користите статив за да се осигурите дека сите стационарни делови од вашата сцена ќе бидат остри во конечната видеоснимка.

Издржливоста на батеријата може да претставува проблем кога снимате многу долги видеоснимки со забрзани движења, па затоа не заборавајте да ја наполните батеријата целосно пред да започнете. За да се минимизира празнењето на батеријата, задниот екран кај одредени фотоапарати се деактивира автоматски според зададените поставки, а може и да го оневозможите преку екранот со поставки за снимање видеоснимки со забрзани движења. За многу долги видеоснимки со забрзани движења се препорачува да прикачите држач со батерија и дополнителна батерија на фотоапаратот или, пак, да користите изборен адаптер за напојување за да имате стабилен извор на напојување.

Кога станува збор за осветлувањето што ќе го користите за снимањето забрзани движења во затворена просторија, во повеќето случаи е подобро да користите вештачка светлина наместо природна светлина за да добиете подоследни резултати. Дневната светлина може да го промени својот интензитет и температура на боја за време на периодот што е потребен за снимање на забрзаните движења. Иако ваквата промена можеби е незабележлива за човечкото око кога ги снимате сликите, таа ќе создаде значително треперење во конечната видеоснимка. Столната ламба е одлична за мали субјекти, особено ако ја омекнете светлината со дифузен материјал.

Функциите за тајмер со интервали или видеоснимка со забрзани движења можат да се овозможат во црвеното мени за фотографирање кај фотоапаратите EOS што нудат најмалку една од овие функции. Некои фотоапарати ги нудат и двете опции, но прво треба да го изберете режимот за видео на фотоапаратот за да добиете пристап до опцијата за видеоснимки со забрзани движења - како што е прикажано тука со EOS 250D.

Некои EOS-фотоапарати ви нудат избор на однапред поставени опции за сцени во менито на опцијата за видеоснимки со забрзани движења. Тие се оптимизирани за различни видови субјекти, како луѓе кои пешачат или облаци што се движат бавно. Меѓутоа, ако сакате целосна контрола врз поставките за снимање забрзани движења, треба да изберете Custom (Приспособено). Тука може да го поставите интервалот помеѓу сликите и вкупниот број на слики од кои ќе ја добиете конечната видеоснимка со забрзани движења. Овие опции го одредуваат времето потребно за снимање на сликите и времетраењето на конечната видеоснимка со забрзани движења, а промените на опциите ќе се прикажат на екранот кога ќе ги прилагодите параметрите.

Изберете интервал според брзината на движењето што се обидувате да го доловите. Ако движењето се случува во краток временски период, како на пример, вашето семејство игра некоја игра или подготвува оброк, тогаш ќе треба да поставите краток интервал од само неколку секунди за да може да доловите низа слики во кои движењето ќе биде рамномерно. Ако движењето е побавно, како на пример, изгревање и заоѓање на сонцето или месечината, тогаш може да изберете подолг интервал. Со менување на интервалот, времето на снимање ќе се зголеми или намали.

Бројот на сликите што ги снимате ќе одреди колку долго ќе трае репродукцијата на конечната видеоснимка со забрзани движења, согласно стапката на слики на видеоснимката. На пример, ако снимате 4K-видеоснимка со забрзани движења и брзина од 25 fps, тогаш за секоја секунда од видеоснимката ќе треба да снимите 25 слики. Тоа значи дека ќе треба да снимите 500 слики за да создадете видеоснимка со забрзани движења што ќе трае 20 секунди. Менувањето на бројот на слики ќе влијае врз времето на снимање и времето на репродукција - и ќе одреди колку слободен простор ќе ви биде потребен на мемориската картичка.

Функцијата за видеоснимки со забрзани движења ви нуди дополнителни опции за контрола, како репродукција на звучен сигнал по снимање на секоја слика. Оваа опција е практична ако фотоапаратот се наоѓа во друга просторија - така ќе знаете кога ќе заврши снимањето на низата слики.

Препорачливо е да поставите рачно колку што е можно повеќе параметри за фотографирање, за изгледот на видеоснимката со забрзани движења да биде доследен од почеток до крај. На пример, ако функциите за стил на слика и баланс на белата боја ги поставите на автоматски, тогаш фотоапаратот може да ги промени поставките за некои слики.

Снимањето забрзани движења нуди многу забава, независно каде се наоѓате. Како и за сите други проекти за фотографирање, така и за оваа техника прво треба да ги совладате основните правила пред да преминете на посложени субјекти. Зошто не го земете фотоапаратот веднаш и не почнете да снимате движења низ вашиот прозорец? Или, пак, ставете статив во кујната кога ќе подготвувате оброк и снимете го процесот на подготовка. Најдобриот дел од снимањето видеоснимки со забрзани движења е тоа што лесно се учи и со задоволство се усовршува. За многу кратко време ќе почнете да ги гледате секојдневните предмети на нов и креативен начин.


Напишано од Marcus Hawkins