Водич за фотографирање со боење со светлина наменет за почетници

Светлината е најважната компонента на фотографирањето, но забавата не мора да запре со заоѓањето на сонцето. Со помош на џебна светилка или друг светлосен извор, може да излезете откако ќе се стемни и да ги обликувате своите слики така што ќе го движите светлото за да создадете облици што ви се допаѓаат. Не може да ги видите тие облици во реално време, но ако снимате со долга експозиција, може да ги снимите во фотоапаратот и да создадете уникатни слики. Техниката често се нарекува „боење со светлина“ или „сликање со светлина“.

Во движењето има некаква магија. Можеби сте виделе фотографии во кои има траги од светлина. Тие најчесто се појавуваат кога автомобилите и другите возила што возат по патиштата навечер оставаат црвени и бели траги од светлина што се протегаат низ сликата. Боењето со светлина ја користи истата идеја, но ја издигнува на покреативно ниво, при што вие имате целосна контрола.

Како и со трагите од светлина, ќе треба да користите долга експозиција што ќе ви овозможи доволно време да ги доловите сите движења на изворот на светлина. Движењето може да биде какво што сакате, а може да користите бели или светилки во боја за да ја обоите сликата.

Иако боењето со светлина претежно зависи од движењето, најчесто ќе ви треба и слабо осветлена заднина што ќе изгледа јасно во сликата. Затоа, ќе треба да го поставите фотоапаратот на статив или на друга стабилна површина. Ако вашиот објектив се одликува со оптичка стабилизација на слика (IS), најчесто најдобро е да ја исклучите кога снимате со долга експозиција. Најновите фотоапарати може да откријат кога се поставени на статив и самите ќе ја исклучат стабилизацијата на слика.

Како и за секоја техника за фотографирање, за боењето со светлина може да ви биде потребно вежбање. Може да ви помогне да ги планирате идните фотографии пред сонцето да зајде за да може да видите кои композиции најдобро функционираат. Кога ќе се стемни, поставете го фотоапаратот на статив и префрлете се во режимот за прегледување во живо за да може да ги прегледувате снимките на LCD-екранот на задната страна.

Различните опкружувања може да понудат алтернативен изглед за фотографиите со боење со светлина. Ако користите релативно кратко време на експозиција од приближно 10 секунди пред темна заднина, таа ќе остане темна и во конечната слика, со што целото внимание ќе биде насочено кон облиците што ги создавате со светилката. Подолгата експозиција со ноќен градски пејзаж или друга осветлена заднина може да додаде контекст во композицијата и да ѝ даде чувство на простор и време.

Добро би било да не го допирате фотоапаратот при снимањето со долга експозиција - дури и ако е поставен на статив - за да избегнете заматеност во сликата поради вибрациите.

За повеќето ноќни снимки, препорачлива е широка решетка со мал f/број и високи ISO вредности за да може да ги замрзнете движењата благодарение на големата брзина на блендата. Кога боите со светлина, важи спротивното, бидејќи движењето е клучниот фактор што сакате да го доловите.

Изберете го рачниот режим на фотографирање (M) на фотоапаратот и користете ниска вредност за ISO, од 100 до 200. Поставете тесна решетка од приближно f/11 и поставете ја брзината на блендата помеѓу 10 и 30 секунди, во зависност од тоа колку време ви треба да ја создадете фотографијата со боење со светлина.

Ќе треба рачно да го поставите и фокусното растојание, затоа изберете го режимот MF. Однапред фокусирајте ја областа во која ќе ја користите светилката за да ја создадете фотографијата. На многу фотоапарати може да го активирате и издвојувањето при рачен фокус (издвојување при MF), визуелно помагало што ви покажува кои делови од сликата се во најостар фокус.

Добар креативен совет е рачно да ги изберете поставките за баланс на белата боја. На пример, користењето на поставките „дневна светлина“, „сенка“, „облачно“ и „вештачка светлина“ ефективно ќе ја промени температурата на боите и ќе овозможи ефект на потопли или постудени бои. Ако таа опција е достапна на вашиот фотоапарат, фотографирајте во режим за RAW-квалитет, кој ви овозможува да ги промените поставките за баланс на белата боја при обработката на сликата во софтвер за уредување како што е Canon Digital Photo Professional.

Почнете едноставно, со помош на поставките на фотоапаратот што ви ги предложивме и користете го блицот на вашиот паметен телефон за да создавате основни форми, па дури и да си го напишете името со светлото. Може да согледате дека ви е потребна пократка или подолга експозиција или поширока или потесна решетка за да го добиете посакуваниот ефект. Експериментирајте со поставките и наскоро ќе добиете претстава за она што најмногу ви одговара.

Користете ја градината како простор за вежбање и фотографирајте ги цветовите, дрвјата или другите живописни растенија. Ако сакате да бидете креативни, обидете се да поставите обоени пластични чашки или хартија пред светилката за да создадете светлосно стапче со кое може да мавтате при долгата експозиција за да создадете живописни ленти и облици.

Осветлете го субјектот со светилката и поставете го автоматскиот фокус на него. Кога ќе завршите со тоа, префрлете со во режимот MF за да го заклучите фокусното растојание. Ако сакате експозицијата да трае повеќе од 30 секунди, изберете го режимот за експозиција со светилка, ако фотоапаратот го поддржува.

Започнете ја експозицијата и почнете да ја движите светилката или другиот светлосен извор низ кадарот. Живописните украсни светилки може да додадат креативност. Добар ефект може да се постигне ако мавтате со нив или со друг светлосен извор зад предметите, за тие да изгледаат како силуети. Ако сакате да додадете повеќе светлина во одреден дел од сцената, тогаш насочете ја светилката на тоа место неколку секунди пред да ја насочите кон зеленилото и другите области за да создадете живописна заднина.

Понекогаш помалку е повеќе. Користењето многу силна светилка може да ви изгледа како добра идеја, но најчесто подискретните светлосни извори даваат подобри резултати. Моќните светилки насочени директно во објективот може да предизвикаат одблесоци, а со светилките со помала моќност нема опасност од тоа. LED-свеќичките и разнобојните LED-светилки исто така може да дадат одлични резултати, а LED-светилките што трепкаат произведуваат алтернативен ефект со наизменични блесоци.

Може да биде забавно да ги вклучите и пријателите и семејството, па и тие да ги осветлуваат областите што им се интересни. Една светилка не мора да го опфати целиот субјект, бидејќи може да ја движите додека трае експозицијата за селективно да ги осветлувате разните области. Ова може да даде одличен резултат при осветлувањето на интересните точки во ноќните пејзажи.

Дополнителните светилки или други светлосни извори може да бидат одличен начин да се вклучите себеси или други луѓе во сликата. Може да се обидете и да пишувате зборови или да цртате облици како ѕвезди и срца. Друга опција е да ја комбинирате долгата експозиција со кратко светлосно пулсирање од Speedlite од Canon за да добиете правилна експозиција за портрет или друг субјект во преден план и да го замрзнете неговото движење, а притоа сѐ уште да може да боите со светлина во остатокот од експозицијата.

Кога фотографирате за забава, боењето со светлина може да биде одличен начин да ја покажете вашата креативност. Нема потреба од скапи фотоапарати, објективи и дополнителна опрема. Потребно ви е само малку време да ги научите основите. Наскоро ќе видите дека создавате многу впечатливи слики со навистина уникатен изглед.



Напишано од Matthew Richards