ПЕЧАТЕЊЕ

Уредување на вашите фотографии за печатење

Вашиот детален водич за постигнување на најдобрите резултати при печатењето на вашите фотографии.
Жена држи пакување хартија за печатење од Canon во едната рака и разгледува отпечатени фотографии на масата пред себе. Покрај фотографиите има отворен лаптоп. Во заднината може да се види печатач од Canon, поставен на комода.

Отпечатените фотографии може да бидат одлични подароци и спомени. Може да ги користите вашите фотографии за да создавате честитки, календари и украси за домот, да составувате колажи или да ги персонализирате вашите предмети со налепници од омилените слики. Отпечатените материјали може да бидат и трајни спомени од патувањата, семејните собири или специјалните моменти од животот на вашето семејство.

Може да избирате од голем број апликации за печатење. За картички и календари, Easy-PhotoPrint Editor од Canon ви овозможува да ги уредувате, отсекувате или менувате заднините, да додавате текст или рамки и да користите многу други креативни алатки како што се шаблоните, печатите и симболите за да ги подобрите вашите слики, а потоа и да ги отпечатите. Апликацијата Canon PRINT ви го олеснува и печатењето на голем број проекти за печатење и ви отвора свет на креативни можности.

Освен за развивање на вашата креативност и за додавање сопствени детали, секако, би сакале отпечатените материјали да го имаат најдобриот можен квалитет, со остри детали, богат опсег на тонови и реалистични бои. Овде ќе се задржиме на оптимизирањето на вашите слики со Digital Photo Professional (DPP) од Canon или вашиот претпочитан софтвер за уредување за да ги добиете најдобрите резултати при печатењето.

Лаптоп стои отворен на биро со софтверот Canon Easy-PhotoPrint на екранот, хартија од Canon од левата страна и печатач од Canon од десната страна.

Софтверот Easy-PhotoPrint Editor од Canon го олеснува додавањето текст, рамки, шаблони и други креативни детали во вашите фотографии пред нивното печатење на компатибилните печатачи PIXMA и MAXIFY. Тој се одликува и со алатка за автоматска корекција на фотографиите која е дизајнирана да ги оптимизира фотографиите за печатење.

Маж држи отпечатена фотографија пред Големиот Канал во Венеција, а во заднината се гледа маса на која е поставен печатач од Canon.

Изберете тип на хартија што ќе одговара на вашите фотографии од специјалните семејни патувања и бидете сигурни дека ќе создадете спомен што ќе го чувате засекогаш.

Избирање печатач

Кој печатач треба да го користите? Ако планирате да купите печатач, погледнете ги нашите водичи за најдобрите печатачи од Canon за печатење фотографии и печатачи за разна употреба. Засега, ќе претпоставиме дека користите добар инк-џет печатач за општа намена.

Треба да имате предвид дека може да очекувате боите да бидат пореалистични ако користите печатач со повеќе од основните мастила во четири бои. На пример, серијата Canon PIXMA TS8750 користи шест посебни картриџи што вклучуваат пет мастила базирани на боја за печатење фотографии со врвен квалитет, со подобрен простор на бои и опсег на тонови. За уште поуникатен впечаток, Canon PIXMA PRO-200, кој користи осум поединечни картриџи за мастило базирани на боја, нуди печатење во голем формат A3+ со професионален квалитет по релативно достапна цена.

Избирање хартија

Без разлика кој печатач го користите, изберете соодветен тип на хартија што ќе одговара на карактерот на сликата и посакуваниот тип на отпечатен материјал. Воглавно, сјајната фотохартија како што е GP-501 од Canon може да поддржи поширок опсег на тонови од мат фотохартијата, што ја прави добар избор за печатење живописни фотографии во боја со фотолабораториски квалитет. Мат-хартијата како што е MP-101 од Canon е одлична за печатење поамбиентални слики со низок контраст, особено црно-бели. Достапни се и хартии за фина уметност и хартии базирани на платно со различна текстура и завршна обработка, кои може да бидат совршени за уникатни украси или подароци за паметење.

Најважно е дека различните медиуми различно го апсорбираат мастилото и имаат различни рефлективни карактеристики, така што клучно е да ги користите правилните поставки при печатењето. Освен тоа, за најдобри резултати, имајте ја предвид намената на сликата и оптимизирајте ја за медиумот на кој печатите.

Корисник во едната рака држи отпечатена фотографија до лаптоп на кој се прикажани фотографии од истата пригода. На масата се поставени повеќе отпечатени фотографии околу лаптопот.

Најновите лаптопи најчесто ги прикажуваат боите со премногу ладни (премногу сини) тонови, а се одликуваат со сооднос на контрастот до милион спрема еден – илјадници пати поголем од контрастот на отпечатените фотографии. За подобро да го усогласите тоа што го гледате на екранот и тоа што ќе го добиете со печатењето, намалете ја светлината на екранот и калибрирајте ги боите. За почеток, приспособете ја белата боја што ја гледате на екранот за таа да одговара на белата боја на хартијата што ја користите.

Управување со боите

Пред да почнете да ги уредувате фотографиите, доколку сте во можност, добра идеја е прво да го калибрирате мониторот. Тоа значи дека вашите отпечатени материјали ќе бидат повеќе усогласени со тоа што го гледате на екранот, со што ќе се намали потребата од експериментирање, кое може да одземе време и ресурси. Најефикасниот начин да го изведете тоа е со помош на комплет за калибрација, но ако тоа е преголема инвестиција за повременото печатење фотографии, ви нудиме неколку брзи решенија што ќе може да ги пробате.

Прво, многу често се случува отпечатените материјали да изгледаат премногу темно, едноставно затоа што мониторите прикажуваат многу повеќе детали во деловите што се во сенка отколку во отпечатените фотографии. Модерните екрани поддржуваат многу поголем опсег на светлина од отпечатените материјали, со сооднос на контрастот од најчесто 1000:1, а често и многу повеќе. За споредба, најдобрата сјајна фотохартија може да постигне контраст од 200:1 меѓу најтемната црна и најсветлата бела боја, а соодносот на мат хартијата може да биде само 100:1. За попрецизно да го прикажете на екранот тоа што би го добиле при печатењето, едноставно намалете ја светлината на мониторот.

Второ, модерните LCD-екрани најчесто ја нагласуваат сината боја, особено кога се нови (боите најчесто стануваат потопли – пожолти – со стареењето на екранот). За да го коригирате ова во Windows, одете во Поставки > Екран > Калибрирање на бојата на екранот. На Mac, одете во менито Помош и побарајте го помошникот за калибрирање на екранот. Екраните најчесто имаат стандардна поставка за бела точка (температура на боите) од D65 или 6500K – обидете се да ја промените во D50 или 5000K. Или, пак, поедноставно, поставете ја белата точка така што белата боја прикажана на екранот ќе се совпаѓа со белата боја на хартијата на која ќе печатите, под условите за осветлување во кои таа ќе биде изложена, а погрижете се и светлината на екранот да не ви го залаже окото.

На крајот, проверете ги вашите поставки за бои. Во DPP, одете во Алатки > Претпочитани поставки и кликнете Управување со бои. Не грижете се за првата опција, Работен простор на бои – професионалните фотографи понекогаш фотографираат во Adobe RGB, поширок простор на бои, но ако вашите фотографии се во sRGB, тогаш нема да имате практична корист да ги менувате. Во појавувачкиот прозорец Профил за печатење, изберете го печатачот што ќе го користите. Кај печатачите што ги поддржуваат, DPP го применува управувањето со боите со помош на ICC-профили, кои содржат детали за точните опции за бои на уредите и овозможуваат поголема прецизност на боите.

До оваа опција, за Намера за рендерирање, изберете Релативно колориметрично. Доколку во сликата има бои што излегуваат од палетата или опсегот на бои на печатачот, оваа поставка овозможува тие да бидат конвертирани во најблиските бои што може да се печатат, но остатокот од сликата ќе остане непроменет. Ако ја изберете опцијата „Перцептивно“, тогаш сите бои во сликата ќе бидат приспособени за да се задржи соодносот помеѓу нив, а честопати може да откриете дека сликите во боја ја губат заситеноста и изгледаат придушено. Боите генерално ќе се променат помалку ако ја користите опцијата „Релативно колориметрично“.

Слика од екран од софтверот DPP од Canon на која се прикажува подобрување на осветленоста на слика од прегрнат штотуку венчан брачен пар.

Софтверот Digital Photo Professional (DPP) од Canon ви нуди поопширни опции отколку апликациите во паметните телефони, така што имате можност, на пример, да вршите насочени приспособувања на одредени бои со помош на лизгачите за нијансите, заситувањето и осветленоста за секој опсег на бои.

Основи на уредувањето

Ако може да започнете со RAW-датотека, која ги содржи сите податоци за боите и тоновите снимени од сензорот, ќе имате поголема слобода за уредување. Но, ако не сте фотографирале во RAW-формат, сѐ уште може да ја користите DPP за да ја подобрите вашата слика за печатење (иако одредени алатки и опции нема да бидат достапни). Ако почнувате со слика во TIFF или JPEG-формат, најдобро е да работите на копија од сликата за да го задржите оригиналот.

За RAW-датотеките, добар прв чекор е да ги коригирате оптичките аберации со Digital Lens Optimizer на DPP (ако сте користеле поддржан фотоапарат со поддржан објектив) или алатките во панелот „Корекција на објективот“, кои може да ги коригираат недостатоците како што се ефектот на вињета и изобличувањата на објективот. За JPEG-датотеките се применуваат голем број корекции на објективот во самиот фотоапарат.

DPP 4.17 се одликува со функцијата Neural Network Image Processing (потребна е претплата), која користи AI со машинско учење за паметно да ги анализира различните делови на секоја слика и да примени одбрани подобрувања според содржината на сликата. Таа може да ги подобрува деталите, да применува намалување на шум со повисоки перформанси во деловите со помалку детали и да ги коригира недостатоците и изобличувањата предизвикани од несовршеностите на објективот. Ако често печатите фотографии или ако сакате да печатите фотографии од важни животни настани како што се свадбите, тогаш вреди да размислите за претплата.

Слика од екран од софтверот DPP од Canon на која се прикажува фотографија од невеста која се подготвува. Областите што се недоволно експонирани се обележани со сина боја, а преекспонираните области се со црвена боја.

DPP се одликува со многу практичен прозорец за предупредување за светлите и темните делови на сликата, кој може да ве предупреди за областите кај кои постои ризик од отсекување (губење на деталите на тоновите). Приказот со црвена боја ги означува деловите што може да бидат отпечатени како бели, без детали, а приказот со сина боја ги прикажува деловите во сенка за кои постои ризик да бидат отпечатени без препознатливи детали. Овој приказ може да ви помогне да ги извршите соодветните приспособувања на светлината и тоновите.

Отсекување и усовршување на композицијата

Следно, размислете за композицијата на вашата слика. Ако планирате да отпечатите материјали со сооднос на слика што се разликува од соодносот на оригиналната слика, како што е квадратен портрет од 1x1 или широкоаголен пејзаж од 16x9, а потоа отсечете ја за да го обликувате кадарот како што сакате, без да ги изоставите важните елементи на сликата. Може да отсекувате и за креативен ефект, без разлика дали ќе ги отстраните несаканите делови или деловите што го одвлекуваат вниманието од сликата или ќе го насочите вниманието кон конкретен елемент. Може да ја ротирате сликата за да го поттикнете интересот или да го израмните закосениот хоризонт.

Принципите на композицијата како што е правилото на третини може да ви помогнат да создадете креативен кадар што ќе го води окото. Во портретите, отсекувањето одблиску може да додаде впечатливост, но најчесто е најдобро да избегнувате да го позиционирате субјектот до самиот центар на кадарот – асиметричните композиции изгледаат подинамично.

Избегнувајте отсекување на многу мал дел од сликата, затоа што тој може да содржи недоволно детали за задоволително печатење. Со оглед на тоа, Canon воведе револуционерна алатка за зголемување на резолуцијата со невронска мрежа (потребна е претплата),1 која може да ја удвои резолуцијата на сликите со многу пореалистични резултати од стандардното зголемување на резолуцијата. Оваа алатка, овозможена од технологијата за обработка на слика со длабоко учење, би можела да биде идеална ако фотографијата била отсечена во голем степен или едноставно нема доволно пиксели за печатење во големи формати.

Или, пак, наместо да ја отсечете заднината со детали што го одвлекуваат вниманието, можеби би можеле да ја заматите? Потоа можете да примените и покреативни уредувања, можеби и да ги коригирате тоновите на боите со помош на функцијата за Приспособување на балансот на белата боја на DPP, дополнително да ги обработите флеките или несаканите детали или да користите филтри и стилови на слика за брза и едноставна стилизација. На пример, може да направите сликата да изгледа како да била фотографирана со стар фотоапарат за еднократна употреба или да ѝ дадете старомодна завршна обработка во сепија, а на располагање ви се и многу други ефекти.

Слика од екран од софтверот DPP од Canon на која се прикажува хистограм и други опции во панелот на алатката за приспособување на гамата.

Во панелот на алатката за приспособување на гамата на DPP, ако вашата слика изгледа премногу темно или осветлено, обидете се да го кликнете копчето Автоматски (A) над хистограмот за да извршите брза корекција. Проверете дали хистограмот целосно се протега од левата до десната страна и дали опаѓа кон двата краја. Ако запира пред да стигне до некој од краевите (како во овој пример), повлечете ги маркерите под него (B) навнатре додека не дојдат до самите рабови на графиконот. Тоа ќе ги претвори темните сенки во целосно црни, а најосветлените делови во целосно бели. Овој целосен опсег на темното кон светлото ќе овозможи сликата да изгледа побогато и повпечатливо кога ќе се отпечати, особено на сјајна фотохартија.

Слика од екран од софтверот DPP од Canon на која се прикажуваат контролите на панелот на напредната алатка, вклучувајќи го контрастот, заситеноста на боите и острината.

Панелот на напредната алатка на DPP нуди контроли за приспособување на тоновите, боите и острината. Во DPP не е можно да се постави маска на областите и локално да се применува изострување, како што е можно во одредени софтвери за уредување како што е Adobe Photoshop,2 но со користење на опцијата за намалување острина на маска во DPP (достапна за RAW-датотеки), поставување ниска вредност за поставката за рафинираност и подигнување на прагот, ефектот на изострување ќе се ограничи на рабовите и ќе се избегне добивањето погруб изглед на текстурата на кожата и другите делови на сликата со релативно низок степен на детали.

Приспособување на тоновите и динамичкиот опсег

Ако сликата е темна или контрастот е низок, може да ја користите функцијата за автоматска оптимизација на осветлувањето во DPP за автоматски да ги коригирате светлината и контрастот. Ако сакате да преземете поголема контрола, отворете го панелот на алатката за приспособување на гамата во DPP. Овде, како и вашиот фотоапарат, DPP прикажува хистограм – графички приказ на тоновите на сликата, од најтемни до најсветли. Ако графиконот се прекинува на некој крај, тоа значи дека во сликата постои отсекување, а деталите на тоновите се губат во најсветлите или најтемните делови.

Почнете така што ќе кликнете на Автоматски (над хистограмот), со што автоматски ќе ја приспособите белата, црната и средната точка и ќе ги ресетирате функцијата за автоматска оптимизација на осветлувањето и контрастот. Потоа може рачно да ги приспособувате светлината, балансот на белата боја и другите поставки.

Многу корисници сакаат да ја зголемуваат заситеноста и контрастот за да ги направат сликите повпечатливи – за да го постигнете тоа, пробајте го панелот на напредната алатка на DPP. Може и да ја промените вкупната експозиција со лизгачот за приспособување на светлината. Понекогаш може да биде добра идеја во целина да ја осветлите сликата ако печатите на мат хартија, која може да изгледа помалку бело, но внимавајте да не претерате – престанете кога белите области ќе изгледаат бело наместо сиво. Ако сликата почне да изгледа нереалистично, намалете го степенот на сенките и осветлените делови со помош на лизгачите.

Ако е потребно, може да го користите панелот на алатката за делумно приспособување на DPP за детално да ги приспособувате светлината, контрастот, нијансите и заситеноста на конкретни делови на сликата.

Слика од екран од софтверот DPP од Canon на која се прикажува фотографија од речно крајбрежје снимена во самрак, а намалувањето на шумот на сликата е видливо во облаците и прикажано во прозорецот со детали на DPP.

Фотографиите снимени при слаба светлина може да имаат шум на слика, особено во деловите под сенка, така што прекумерното изострување може уште повеќе да го влоши тој шум, како што покажува одблиску прикажаниот прозорец со детали во панелот од десната страна на DPP.

Слика од екран од софтверот DPP од Canon на која се прикажува истата фотографија од речно крајбрежје снимена во самрак, со големо намалување на шумот на сликата.

DPP се одликува со многу ефикасни алатки за намалување на шумот, кои може да се насочат кон шумот на осветлувањето (зрнеста текстура) и шумот на бои (дистрибуција на светлината). Споредете ги деталите на сликата одблиску со оригиналот.

Изострување за печатење

Изострувањето секогаш треба да биде последниот чекор. Ќе добиете најдобри резултати ако сликата е колку што е можно поостра уште на почетокот, така што прво ќе треба да се справите со шумот на сликата (и да го избегнете повторното отворање и зачувување на JPEG-сликите – квалитетот на сликата ќе се намалува при секое повторување на постапката). За да извршите изострување или намалување на шумот, погледнете ја сликата со зголемување од 100% за да може јасно да ги гледате ефектите.

Сите фотографии може да имаат корист од одреден степен на изострување бидејќи печатењето само по себе малку ги придушува сликите, но тоа се разликува во зависност од типот на хартија - колку повеќе мастилото се апсорбира и разлева, толку е поголем ефектот на придушување. Тоа значи дека за печатење на платно ќе биде потребно поголемо изострување отколку за печатењето на полусјајна хартија, а уште помалку за печатењето на сјајна фотохартија.

Алатката за изострување на DPP ќе го подобри контрастот околу рабовите на сликата за да создаде впечаток на поголема острина, но функцијата за намалување на острина на маска ви нуди поголема контрола – таа има посебни контроли за јачината, рафинираноста и прагот. Меѓутоа, за разлика од сличниот софтвер како што е Photoshop, во DPP, алатката за намалување на острина на маска е достапна само за RAW-датотеките.

Без разлика кои алатки ги користите, изострувајте селективно – избегнувајте го изострувањето таму каде што сакате нежни преоди, рамномерни тонови на кожа или непрепознатливи заднини. Изострувањето на областите со придушени бои може да предизвика непривлечен шум на слика. Благодарение на Neural Network Image Processing Tool во DPP 4.17, фините детали и текстурата може автоматски да се изоструваат за да се постигне најдобриот ефект, а деловите од сликата во кои има релативно малку детали ќе ги задржат рамномерните градации и изгледот без шум.

Поставки за оптимално печатење

Подготвени за печатење? Наместо само да изберете Печатење, одете во Датотека > Печатење со детални поставки. Оставете ја резолуцијата на 350dpi, стандардната вредност за печатење на DPP. За најдобри резултати, секогаш поставувајте ја опцијата Квалитет на печатење на „Висок“. Користењето на правилните претпочитани поставки (како погоре) би требало да го спроведе усогласувањето на бои, но во паѓачкото мени Тип на хартија, клучно е да ја изберете хартијата што ја користите – ако ги изберете погрешните поставки овде, може да го поништите целиот претходно вложен труд.

Следете го овој водич за да извлечете максимум од вашите фотографии и да создавате отпечатени материјали што со задоволство ќе ги изложувате или споделувате, а погледнете ги и најдобрите совети за изложување семејни фотографии на професионалците.


Напишано од Alex Summersby

  1. Neural Network Upscaling Tool е достапна само за Windows, потребна е претплата (достапен е бесплатен пробен период од еден месец). Ако се претплатите на Neural Network Processing Tool, за Neural Network Upscaling Tool нема потреба од дополнителна претплата.
  2. Adobe и Photoshop се заштитени трговски марки или трговски марки на Adobe во САД и/или други земји.

Слични производи

Слични написи

  • ОСНОВИ

    Фотографирање слики за печатење

    Седум одлични совети за овековечување на спомените преку печатење.

  • Фотографија пред и потоа од пар на денот на нивната венчавка покрај езеро, темна и неуредена од лево, покажувајќи ја посветлата верзија на лево, изменета во DPP.

    ОСНОВИ НА УРЕДУВАЊЕ

    Како да уредувате битни фотографии

    Подобрете ги вашите фотографии од посебни прилики со овие едноставни совети за уредување фотографии.

  • ФОТОГРАФИРАЊЕ СВАДБИ

    Создадете го вашиот свадбен албум

    Создавањето свој свадбен албум може да биде многу пријатно искуство. Дознајте како со нашите стручни совети.

  • Фотографија пред и потоа од поле со висока треба, темна и неуредена од лево, покажувајќи ја посветлата верзија на лево, изменета во DPP.

    УРЕДУВАЊЕ ФОТОГРАФИИ / ОБРАБОТКА ПО СНИМАЊЕТО

    Уредување RAW-слики со DPP

    Дознајте како да ги уредувате и подобрувате вашите RAW-фотографии со помош на софтверот DPP од Canon.