Која е разликата помеѓу EOS R50 и EOS R10

Револуционерниот систем EOS R без огледало од Canon беше претставен во 2018 година и оттогаш само се надградува. Првите модели со APS-C-сензор во палетата - EOS R7 и EOS R10 - беа претставени во 2022 година и станаа популарни кај фотографите кои сакаа фотоапарат што се одликува со функциите на системот EOS R во покомпактно куќиште.

Техничките иновации продолжија со претставувањето на EOS R50 од Canon, кој се одликува со истиот одличен квалитет на слика и моќност како и EOS R10, но во уште покомпактно и едноставно куќиште за креаторите кои сакаат да го надградат снимањето со паметни телефони и да ги подобрат своите водичи на YouTube или видеа со танцување на TikTok.

Овде се запознаваме со дел од заедничката технологија и клучните разлики помеѓу EOS R50 и EOS R10, благодарение на експертските совети на Mark Kendrick, специјалист за производи на Canon Europe, како и амбасадорот на Canon Martin Bissig, кој го тестираше EOS R10 при своето патување во Шри Ланка.

EOS R50 од Canon и EOS R10 имаат многу сличности. Сензорот за слика со 24,2 MP доловува богати детали и ги нуди сите поволности на форматот APS-C, меѓу кои и фактор на отсекување од 1,6x што ја продолжува ефективната фокусна должина при користењето RF-објективи, како и преносливо куќиште.

Комбинацијата на EOS R10 со малиот и лесен објектив RF-S 18-150mm F3.5-6.3 IS STM се покажа како особено корисна во Шри Ланка, каде што Martin не сакаше да го привлече вниманието врз себе. „Поради големината на фотоапаратот, секогаш можев да го земам со себе без да се грижам дали ќе треба да понесам и голема торба за фотоапарати,“ вели тој. „Опсегот на зумирање од 18-150 mm (кој е еквивалент на приближно 29-240 mm кај фотоапаратите за целосна слика) ми овозможи да работам многу ефикасно“.

Во срцето на двата фотоапарати е истиот процесор DIGIC X, кој овозможува брзо снимање со одличен одзив. Потоа тука е и софистицираниот систем за автоматски фокус Dual Pixel CMOS AF II – кој може да се најде на професионалните модели како EOS R6 Mark II од Canon – кој може автоматски да ги открива, следи и фокусира луѓето, животните или возилата во сцената. Благодарение на 651 фокусна точка, тие можат да држат чекор со сѐ што сакате да го доловите, од фотографирање акција и диви животни, до презентирање на вашиот канал за готвење на Instagram.

И EOS R10 и EOS R50 се одликуваат со одлични перформанси при слаба осветленост, со вредности до ISO 32000 за фотографии и ISO 12800 за снимање видео, со можност за проширување до ISO 51200 и ISO 25600. Системот за автоматски фокус исто така може да фокусира до -4 EV, приближно еднакво на сцена осветлена од полумесечина.

Вистинската разлика помеѓу двата фотоапарати е во нивната големина и дизајнот. EOS R50 од Canon е полесен од EOS R10, со помала рачка, благодарение на ротираниот отвор за батерија. Неговата длабочина изнесува само 68,8 mm и тежи само 375 g со картичка и батерија (наспроти 83,4 mm и 429 g на EOS R10). Без разлика дали ќе го понесете во скејт-парк за да снимате видеа со брза акција или ќе го ставите во чанта и ќе одите на закуска за да снимите фотографии од ново кафуле, се работи за пренослив фотоапарат што може да го понесете секаде.

Распоредот на копчињата исто така се разликува. „EOS R50 е поедноставен, полесен за користење и запознавање, како и поинтуитивен за корисниците на паметни телефони кои се навикнати да користат екран на допир,“ вели Mark.

Кога се работи за режими на фотоапаратот, EOS R50 нуди нов напреден режим A+ како дел од автоматскиот режим за интелигентно откривање на сцени. „Фотоапаратот автоматски снима и спојува повеќе слики во овој режим, така што може да постигнете напредни техники без да мора да учите како да ги изведете, па дури и без да знаете што точно прави фотоапаратот“, додава Mark.

Ако сакате да научите и да ги развиете вашите вештини за фотографирање, имате можност да ги користите рачните поставки, но за голем број почетници кои користат фотоапарати без огледало, автоматските опции им овозможуваат да не губат многу време со поставките, туку да го употребат времето да создадат впечатливи содржини.

Кога станува збор за видеосодржините, двата фотоапарати нудат снимање видеозаписи во 4K со 30p, со прекумерно семплирање од 6K, целосно користејќи го сензорот, како и Full HD со 120 fps за снимање видеозаписи со забавени движења. EOS R10 има и дополнителна опција за 4K 60p (со отсекување).

Флексибилноста за видеосодржини е помогната од поврзувањето преку HDMI, заедно со приклучокот за микрофон од 3,5 mm и паметниот приклучок за напојување дополнителна опрема како надворешен микрофон. 

Можно е да снимате многу подолго од претходно: неограничено на EOS R10 и до еден час на EOS R50, што би требало да биде доволно за да ги снимите вашите тренинзи без да мора да паузирате при вежбањето.

Во споредба со EOS R10, EOS R50 од Canon нуди неколку нови функции за снимање видеозаписи што би биле идеални за снимање клипови со готвење или создавање водичи за шминкање на YouTube.

„EOS R50 се одликува со режим за видеодемонстрации одблиску“, објаснува Mark. „Тој ги приспособува поставките за фокусирање така што ако принесете нешто до фотоапаратот, тој ќе се фокусира на предметот, но штом го спуштите предметот, повторно ќе се фокусира на вашето лице“. Режимот за видеодемонстрации одблиску е идеална функција за снимање видеоснимки со фотоапаратот, од снимањето забавни готвачки демонстрации до споделувањето на вашите омилени техники за цртање.

Друга нова функција е дигиталната стабилизација на слика за видео (IS), која овозможува тресењето на фотоапаратот помалку да влијае на снимките и рачно снимените видеоснимки да останат рамномерни и јасни.

Без разлика дали снимате за вашиот нов канал за фитнес или снимате впечатливи фотографии од патувања, EOS R50 од Canon и EOS R10 се алатки со високи перформанси за снимање фотографии и видеоснимки. Тие се идеалниот чекор за надградба на системот EOS R од вашиот паметен телефон, компактен фотоапарат или DSLR-фотоапарат, особено бидејќи ви овозможуваат да ја користите побрзата, поквалитетна палета на објективи RF и RF-S за уште повеќе да ги проширите вашите креативни можности и гледишта.

EOS R10 е идеалниот фотоапарат за ентузијастите кои сакаат да снимаат неверојатни фотографии при патувањата или да ги фотографираат свадбите на своите пријатели без да се справуваат со тежината на системите за целосна слика. Тој нуди напредни функции и високо ниво на контрола, благодарение на приспособливите копчиња, вртливи копчиња и режими.

Меѓутоа, EOS R50 е најдобриот основен модел од системот EOS R од Canon, кој ви нуди сѐ што ви е потребно за да снимате, фотографирате и да ги споделувате вашите хобија и интереси. За родените креатори на содржини, тој нуди врвен квалитет на слика, но е и едноставен за поставување и користење веднаш по отпакувањето, а се одликува и со компактен дизајн што нема да ве забави.



Напишано од Lauren Scott