Зачекорување во светот на модното фотографирање

Модното фотографирање е живописна индустрија со многу енергија, но често се смета за ексклузивна и дека пробивањето во неа е тешко. Тука, двајца млади фотографи зборуваат за своите патувања, креативни процеси и менливиот пејзаж на модното фотографирање.

Nina Zimolong живее и работи во Кејптаун, Јужна Африка. Нејзината љубов кон фотографирањето доаѓа од страст кон фотографирање жени од Африка, влечејќи инспирација од природата. Ian Hippolyte од Лондон, Англија, ја започна својата креативна кариера со интерес во филм и брзо сфати дека естетиката и кинематографијата го привлекуваат најмногу. Неговиот премин во фотографирањето мода е мотивирано од верување кое го дели со Nina: во сржта е раскажувањето приказна.

„Модата е многу моќен алат за раскажување приказни“, објаснува Ian. Nina се согласува, додавајќи дека модното фотографирање раскажува подлабока приказна поради сите споени елементи - „облеката, движењето на моделот, позата, локацијата, осветлувањето - сѐ“.

За Ian, влијанието од снимање видео е сѐ уште присутно. Има склоност кон внесување светлина и движење, оживувајќи ги сликите. Ова може да се прикаже како „движење на коса, движење на облека или мало заматување на светлината за да се создаде чувство на движење и енергија“.

Целта му е да создаде фотографии кои имаат чувство на „доловување нешто во движење“, со што ќе бидете вовлечени во целосната приказна.

Nina и Ian имаат уште нешто заедничко: двајцата се инспирираат од градот во кој живеат.

Разновидноста на Лондон е гориво за креативноста на Ian. Од старите згради изградени од тули до елегантните стаклени облакодери, мешавината на културолошката историја и современоста на градот обезбедува бескрајни заднини за неговите фотосесии. Оваа разновидност е доловена и во неговите слики. Во неодамнешна фотосесија, моделот носеше дизајнерско одело во комбинација со долга црвена шамија за глава.

„Мешате отмена француска модна куќа со нешто што е поврзано со црнечка култура“, вели Ian. „Мислам дека тоа ми е најомилено нешто за Лондон - разновидноста“.

Од друга страна, неверојатната природна убавина на Кејптаун ѝ е муза на Nina. „Гледате песочни дини, па планински венци, па плажи кои изгледаат како да се од Малдивите. Кејптаун нуди многу нешта“, вели таа.

Историски, индустријата на модното фотографирање е тешка за пробивање. Ian смета дека има многу „чувари“. Но, социјалните медиуми ги отвораат вратите. Платформите како TikTok и Instagram им овозможуваат на надежните фотографи да ги изложат своите дела, да споделат содржини зад сцените и да се поврзат со глобални публики. „Ви овозможува да ги видите делата на многу луѓе кои не се објавени во списанија“, вели Ian.

Nina вели дека TikTok особено создаде здрава конкуренција. „Ако нема конкуренција, тогаш истите стари професионалци ги создаваат истите здодевни и стари дела и никој не очекува ништо ново“, вели Nina. „Нови луѓе нудат нови и уникатни дела, што е одлично“.

И Ian и Nina се надеваат дека индустријата ќе продолжи да прифаќа нови перспективи и свежа креативност. „Се надевам дека следните пет до десет години ќе ја отворат индустријата повеќе“, вели Ian.

Ian советува да бидете свои ако сакате да се пробиете во светот на модното фотографирање. „Тоа ве издвојува. Најдете свој стил и глас, држете се до него и развијте го“.

Ова може да вклучува да бидете самостоен и да можете да се снајдете со ограничени ресурси, барем на почеток. Ian ни открива дека, кога започнувал, експериментирал со пријатели во импровизирани студија. „Се поставивме во дневната соба и наместивме едно или две евтини светла од eBay“, се сеќава тој. И Nina се залага за ваква снаодливост. Брендови како Maison Schiaparelli ја инспирираа со нивната откачена облека, а таа мисли дека немањето пристап до висока мода во Јужна Африка не треба да ја ограничи. „Ако немам пристап до нешто, не значи дека не можам да го фотографирам. Зошто да не го направам самата?“ вели таа, самоуверено.

Во исто време, вели Ian, научете да работите со други луѓе. За време на модна фотосесија, таму работат и стилисти, шминкери и други луѓе, поради што е клучно да можете да соработувате.

Дополнително, препорачува Ian, „работете го тоа за кое сакате да бидете најмени. На пример, ако знаете дека сакате да снимате црно-бели портрети, тогаш правете го тоа, држете се до него и станете многу добри во тоа. Потенцијалните клиенти ќе ве препознаат по тоа и ќе ве бараат кога ќе го сакаат вашиот стил“.

Советот на Nina е сличен: „Само започнете. Погледнете слика и прашајте се „Како можам да го создадам ова со алатките кои ми се при рака?“ Дури и да не им се допаѓа на луѓето, барем на еден човек ќе му се допаѓа“.

Модното фотографирање е тешко поле, но многу исполнува. Со соодветните алатки, силна визија и малку среќа, можно е да создадете свој простор. За Ian, Nina и многу други, целта е да се достигне „демократизирана“ модна индустрија во која фотографи од различно потекло се поттикнати да ги раскажат своите приказни низ објективот.

Прочитајте повеќе:

• Emmanuel Oyeleke: креативно патување
• Листа со опрема за фотографирање мода

Напишано од Mabinty Taylor-Kamara