Најдобри совети за прекрасни фотографии од домашни миленичиња

Двајцата фотографи Cat и Michael, кои се сопственици на CatsDog Photography, создаваат слики за паметење од кучиња, мачки, зајаци и други животни. Cat е зад објективот, а Michael има улога да го привлекува вниманието на животното, а заедно ги планираат фотосесиите и композициите.

Фотографиите можат да влијаат врз одлуката на луѓето кои сакаат да посвојат домашно милениче, особено за животните кои не се толку фотогенични или не изгледаат добро на фотографиите. За оваа фотосесија, Cat и Michael отидоа во центарот за згрижување животни RSPCA во Престон, Англија, за да снимат убави портрети со цел да им помогнат на неколку животни да го пронајдат својот нов дом.

За време на фотосесијата, ја прашавме Cat да ги сподели своите совети за доловување на карактерот на домашните миленичиња, почнувајќи од користење соодветна опрема и поставки на фотоапаратот па сè до начинот за успешно позирање на палавите животни.

Фотографирањето животни може да биде непредвидливо бидејќи зависи од нив, а тоа особено важи кога работите со згрижени животни. Cat верува дека е важно животното да се прилагоди на вашето присуство. Ова време на спријателување ви нуди и можност да одлучите на кој начин ќе фотографирате.

За почеток може да ги фотографирате додека спијат. На тој начин ќе имате можност да пробате различни агли и да ги прилагодите поставките без да се грижите за привлекување на нивното внимание. Ако вашиот фотоапарат има бесшумна бленда или бесшумен режим, би било пожелно да го активирате.

Откако ќе се подготвите, почнете да си играте со домашното милениче или давајте им грицки за да ги заинтересирате додека фотографирате. Но, одвојте доволно време за да бидете сигурни дека правилно сте ги прилагодиле поставките на вашиот фотоапарат. „Некои луѓе почнуваат да користат извици или играчки што свиркаат уште пред да го прилагодат осветлувањето или композицијата. Нема да можете долго да го задржите вниманието на домашното милениче“ - вели Michael.

Но, во вакви случаи е најважна трпеливоста. Животното може да изгледа премногу возбудено бидејќи се чувствува вознемирено. Постои ризик да го вознемирите животното ако упорно му наредувате да седне или да стои мирно со часови, поради што животното ќе сака да го напушти просторот. „На кучето ќе му здодее пред да завршите со фотосесијата“ - вели Cat. „Од лично искуство научивме дека тоа не е правилниот начин. Дури и ако мора да ја пропуштите таа слика и да преминете на нешто друго, направете го тоа, а животното ќе почне да се чувствува поудобно. Доловувањето на нивниот карактер е можно само ако се чувствуваат удобно“.

Исто така, важно е да бидете свесни за разликите помеѓу кучињата, мачките и другите видови на домашни миленичиња. Сите животни се уникатни, што значи дека ќе мора да го приспособите вашиот стил на фотографирање според нив. „Генерално, фотографирањето кучиња е полесно ако кучето мисли дека само ги носи одлуките, но тоа е многу потешко кога станува збор за мачки“ - вели Michael. „Ставете кутија на подот и мачката ќе влезе во неа, но ако ја ставите во кутијата таа веднаш ќе излезе од неа.

„Кога станува збор за зајаци, тие воопшто нема да ве слушаат, па затоа треба да се снајдете. На пример, може да ги фотографирате ставени врз рамо на некој човек. За нас, фотографирањето во центарот за згрижување прикажува пријатно чувство на поврзаност со некој кој можеби сака да посвои милениче“.

Cat и Michael веруваат дека е најважно да имате многу опции. Cat секогаш ги носи објективите EF 70-200mm f/2.8L IS II USM од Canon и EF 16-35mm f/2.8L II USM од Canon во својата торба со опрема за да може да снима различни слики. Но, таа ја нагласува и важноста за користење различни објективи. „Имам толку многу објективи што секогаш носам различни со себе за секоја прилика“ - вели таа. „Ако постојано користите еден објектив - на пример, објектив од 135 mm - тогаш постојано ќе го добивате истиот стил“.

При оваа посета на центарот за згрижување, Cat го користеше EOS R6 од Canon. Бидејќи претходно користела EOS 5D Mark III, таа сега има многу EF-објективи што ги користи со EOS R6 со помош на адаптерот за монтирање објективи EF-EOS R од Canon. „Воопшто не забележувам дека користам адаптер, што е доказ дека работи беспрекорно“ - вели таа. „Многу ми се допадна и екранот на допир на EOS R6 бидејќи е многу интуитивен и овозможува брзо менување на поставките, што е многу практично во моментите кога фотографирате животни, на пример, можете брзо да допрете на екранот за да фокусирате“.

Подвижниот екран е практичен и кога фотографирате од тешки агли, а екранот на допир со променлив агол кај EOS R6 може да ротира 270° за да ви овозможи да фотографирате на креативен начин. Исто така, неговиот импресивен автоматски фокус ги открива очите на животните и ги следи низ целиот кадар.

Поставките што треба да ги користите за фотографирање домашни миленичиња зависат од изгледот што сакате да го добиете. „Мислам дека нудиме многу поголема разновидност од голем број фотографи за домашни миленичиња“ - објаснува Michael. „Многумина се одлучуваат за долги објективи и широки решетки, што создаваат волшебен стил. Тоа е супер, но ние сакаме да доловиме и колку што е можно повеќе детали“.

Cat се согласува: „според мене, она што ја прави фотографијата специјална е реалното чувство на простор и опкружувањето на животното“ - вели таа.

Ако сакате да снимите слики од животни во движење и сте сигурни дека можете да работите во рачен режим (M), обидете се да користите брзина на блендата од најмалку 1/1000 сек., средна решетка како f/5,6 или f/8 и ISO од приближно 400-800 во зависност од условите за осветлување. Меѓутоа, за портрети од животни е подобро да користите стандардна брзина на блендата од 1/200 сек., поширока бленда како f/2,8 или f/1,8 и пониска вредност за ISO доколку тоа го дозволува осветлувањето.

Ако сте почетник или сè уште го изучувате вашиот фотоапарат, режимот за приоритет на блендата (Tv), што ви овозможува да ја изберете брзината на блендата, а фотоапаратот ја избира решетката, е идеален за слики од движења, додека режимот за приоритет на решетката (Av), со кој ја избирате решетката, а фотоапаратот ја избира брзината на блендата, е посоодветен за статични портрети.

Сепак, вреди да експериментирате со различни комбинации на поставки за да го добиете посакуваниот изглед. Пожелно е да користите некој предмет како субјект, на пример, играчка, доколку немате трпеливо милениче со кое може да вежбате.

Исто така, важно е да ја користите заднината и доколку не е можно да појдете на некоја убава локација, користењето долги објективи за да ја дефокусирате заднината ќе ви помогне многу.

Во центарот за згрижување, Cat и Michael одлучија да не ги фотографираат животните во нивните кафези. „Избегнувајте да ги фотографирате ‚зад решетки‘“ - вели Michael. „Ако ја пренесете приказната за одредено животно, може да ги заинтересирате луѓето за неговото згрижување и потенцијално да создадете интерес за сите животни во центарот“.

Избирањето агол што ги нагласува убавите карактеристики е одлична идеја. Ова е особено важно за згрижените животни бидејќи може да помогне во пронаоѓањето трајно живеалиште за нив. „Седнете ги малку на страна и обидете се да им ја завртите главата за да погледнат преку нивното рамо, доколку е можно“ - продолжува Michael.

Позата во која сакате да го доловите домашното милениче ќе зависи само од неговата големина. „Ако работите со мало куче, на пример, обидете се да ги подигнете на нешто“ - вели таа. „Ако кучето е премногу активно и не може да седи мирно, може да доловите неколку слики од движења, а јас ваквите кучиња ги фотографирам врзани на ремен“. Препорачливо да ги фотографирате кучињата кога не се врзани на ремен, само ако можат да почитуваат наредби и да седат мирни. 

Доближувањето до животните може да резултира со прекрасни слики. Cat ви препорачува да фотографирате од низок агол на подот за да бидете на исто ниво на очи, со цел да не го исплашите вашето домашно милениче. Доколку можете, обидете се да ги фокусирате нивните очи, бидејќи така ќе внесете емоции во вашите слики. AF на очи кај EOS R6 од Canon е одличен за вакви прилики.

Или, пак, ако сакате да добиете динамичка слика, фотографирајте од висок агол над животното. Ова не е секогаш препорачливо за згрижени животни што може да бидат исплашени доколку ги фотографирате од горната страна, но затоа е идеално за вашите домашни миленичиња, доколку имаат самодоверба.

„Откако ќе се спријателите, ако задржите грицка блиску до вашиот објектив, или ако некој ви помага и движи топка наоколу, ќе можете да се навалите врз нив и да ги фотографирате како гледаат нагоре кон вас. Така може да добиете многу интересна слика“ - вели Cat.

Ако немате помошник или фотографирате од тежок агол, обидете се да фотографирате далечински, но никогаш не форсирајте во фотографирањето доколку забележите дека вашиот субјект е вознемирен или изнервиран. „Ако е премногу вознемирен или изнервиран, престанете да фотографирате“ - објаснува Cat. „Дури и ако мора да ја пропуштите таа слика и да преминете на нешто друго, направете го тоа. Животното треба да се чувствува опуштено за да можете да го доловите неговиот карактер“.

Животните со темно крзно можат да го збунат фотоапаратот и да добиете слика со премногу мала експозиција, а едно истражување покажа дека за црните животни, особено мачки, има помала веројатност да бидат посвоени поради - меѓу другото - нивниот изглед на фотографиите. Многу е полесно да фотографирате животни со светли бои. Michael додава дека дури и ако осветлувањето не е соодветно за животно во каква било друга боја, тоа ќе изгледа добро на фотографиите, за разлика од животните со темно крзно. Но, не очајувајте. „Ако создадете правилно осветлување на кој било субјект, субјектот ќе изгледа одлично“ - охрабрува тој.

Cat додава: „внимавајте каде ќе го позиционирате изворот на светлина. Ако изворот на светлина е силен, завртете го животното кон него за да добиете помал контраст“.

Исто така, важно е да ја земете предвид и заднината. „Веројатноста да се вклопат во заднината е поголема ако заднината е темна“ -вели Michael. „Користењето рефлектор за да ги осветлите под муцката е одличен начин за да добиете и дефиниција“. Ако немате рефлектор, не грижете се. Лесно може да си направите дома од картон и кујнска фолија - и други додатоци.

Советите на Cat за фотографирање домашни миленичиња и згрижени животни може да ви помогнат во доловување на нивниот карактер. „Целта е луѓето да ги видат животните и да се поврзат со нив, независно дали сакаат портрет што ќе ги асоцира на милениче што ќе го чуваат со години или ќе го погледнат животното и ќе си помислат ‚Ова куче припаѓа во нашето семејство за да имаме полна куќа‘“ - вели таа.

Времето што го поминаа Cat и Michael со животните во центарот за згрижување придонесе за пронаоѓање совршени семејства за животните. Јазовичарот Ева сега е посвоен, а германскиот овчар Зевс ги чека своите идни сопственици. Пред да дојде во центарот за згрижување, Зевс живеел во куќа со повеќе миленичиња во која имало знаци на насилство. Тој бил во различни прифатилишта, што не се идеални за германски овчари, но, да се надеваме дека ќе пронајде дом во кој ќе го носат на прошетки и ќе биде сакан. 

Во следната прилика за фотографирање на вашите прекрасни миленичиња, експериментирајте со овие совети. Или, пак, зошто не волонтирате во локалниот центар за згрижување животни и да ги фотографирате животните за да им ги зголемите шансите за посвојување? Споделете ги вашите слики со #LiveForTheStory и ставете ознака @canonemea. 

Напишано од Astrid Pitman