Неопходни совети и техники за макро фотографирање

Сликите одблиску од најразлични субјекти, почнувајќи од инсекти па сè до цвеќиња, храна и предмети во домаќинствата, можат да откријат извонредни нивоа на детали. Можеби ќе си помислите дека ви треба скапа опрема и професионални вештини за да снимите одлични макро фотографии, но со само неколку совети сите можат да снимаат неверојатни слики одблиску, дури и со фотоапарати и објективи според вашиот буџет. Прочитајте го нашиот водич за макро фотографирање и дознајте ги сите совети што ви се потребни.

Заради поголема практичност, повеќето фотоапарати од Canon од основна класа имаат режим за макро фотографирање што е достапен на вртливото копче за режими или во менито. Тој ги оптимизира сите важи поставки за фотографирање одблиску. Макро фотографирањето е уште поспецифично и за тоа најчесто ви треба објектив со зголемување од 1,0x. Тоа значи дека малите предмети се репродуцираат во реална големина на сензорот за слика на фотоапаратот, овозможувајќи екстремно зумирање кога ги гледате конечните слики на екран или во отпечатена форма.

Целта на овој водич за макро фотографирање е да ги одговори најпоставуваните прашања за макро фотографирање и фотографирање одблиску, како на пример:

1. Избирање на вашата опрема: може да снимате одлични фотографии одблиску независно каква опрема имате, но моќните фотоапарати и наменските макро објективи ќе ви помогнат да фотографирате на повисоко ниво.
2. Разбирање на поставките: автоматските режими за макро се одлични за стандардни слики одблиску, но со избирање на режимот за приоритет на решетка (Av) или рачниот режим (M) ќе можете да бидете максимално креативни.
3. Задржување на фокусот: сигурните системи за автоматско фокусирање на Canon се одлични за стандардни фотографии, но ако сакате да ги снимите најдобрите макро фотографии, тогаш ќе ви требаат функции како издвојување со фокусот и фокусирање со групирање.
4. Уредување на фотографиите: квалитетот на макро фотографиите може многу да се подобри со уредување, но не е потребно да сте професионалец за тоа. Со отсекување на вашите слики може да ги ставите малите детали во преден план, а со алатката Spot Healing може да го подобрите конечниот производ.

Не ви требаат скапи фотоапарати и објективи за да снимате слики одблиску. Најдобриот фотоапарат за макро фотографирање е тој што веќе го имате. Голем број фотоапарати од основна класа, од типот „насочи и фотографирај“, имаат режим за макро фотографирање што нуди растојанија за фокусирање дури до 1 cm. Компактниот фотоапарат PowerShot G7 X Mark III од Canon има помоќен режим за макро, надополнет со функција за издвојување со фокусот заради прецизно рачно фокусирање, но ќе се навратиме подоцна на тоа.

Фотоапаратите EOS со заменливи објективи ви нудат поголема флексибилност за фотографирање одблиску, бидејќи секогаш ќе можете да го прикачите идеалниот објектив за задачата. Исто така, имаат екрани на допир со променлив агол што овозможуваат фотографирање од сите агли и нудат опции за фокусирање со групирање и издвојување со фокусот.

Фотоапаратот без огледало EOS M50 Mark II од Canon е одлична опција со достапна цена, особено ако го користите заедно со објективот EF-M 28mm f/3.5 Macro IS STM. Тој ќе ви понуди поголемо зголемување од 1,2x и е првиот објектив со автоматски фокус во светот што е опремен со вградено LED-светло Macro Lite за осветлување на субјектите.

Кои се најдобрите објективи за макро фотографирање?

• RF 100mm F2.8L MACRO IS USM од Canon
• RF 85mm F2 MACRO IS STM од Canon
• RF 35mm F1.8 MACRO IS STM од Canon
• EF 100mm f/2.8L Macro IS USM од Canon
• EF-S 35mm f/2.8 Macro IS STM од Canon
• EF-M 28mm f/3.5 Macro IS STM од Canon

За ентузијастите кои сакаат да фотографираат макро слики на повисоко ниво, идеална опција се наменските макро објективи и палетата на фотоапарати за целосна слика од Canon. Сензорите за целосна слика вградени во EOS RP и EOS R6 од Canon нудат неверојатен квалитет на слика во услови со слабо осветлување, за да можете да снимате јасни слики дури и при високи вредности на ISO. И двата модели имаат режим за фокусирање со групирање што е многу практичен за макро фотографирање, но тоа ќе го објасниме малку подоцна. Одлични објективи со кои може да ги комбинирате се RF 35mm F1.8 MACRO IS STM и RF 85mm F2 MACRO IS STM од Canon. Тие нудат максимално зголемување до 0,5x и хибридна стабилизација на слика за рачно фотографирање слики без заматување.

Истото важи и за професионалниот EF 100mm f/2.8L Macro IS USM од Canon за DSLR-фотоапарати. Ако ви треба огромно зголемување, тогаш изберете го RF 100mm F2.8L MACRO IS USM од Canon што нуди врвни перформанси и зголемување до 1,4x.

Режимот за макро фотографирање кај голем број фотоапарати од Canon функционира солидно, но ако сакате да снимите покреативни слики одблиску со фотоапарати за ентузијасти, тогаш е најдобро да ја преземете контролата. Користењето полуавтоматски или рачни режими може да ви понуди одлични резултати.

Голем предизвик е тоа што длабочината на полето (растојанието помеѓу најблиската и најдалечната точка во сцена што се прикажува остро) е многу мала во снимање слики одблиску и апсолутно минијатурна при макро фотографирање. За да добиете максимална длабочина на полето, изберете го режимот за фотографирање Av (приоритет на решетка) и помала решетка приближно од f/16 до f/22. Но, ако осветлување е слабо, можно е да треба да користите мала брзина на блендата за да добиете соодветна експозиција. Тоа нема да биде проблем доколку користите статив за макро фотографии од цвеќиња, слики одблиску од храна и друга мртва природа, но недоволното осветлување може да резултира со слики без длабочина. Ако фотографирате во затворена просторија, тогаш може да го зголемите осветлувањето со столна ламба или да ја искористите дневната светлина што навлегува низ прозорците. LED-лампите за фотографирање се уште една добра опција, како и LED-светлата Macro Lite кај одредени објективи од Canon, наведени погоре.

За макро фотографиите од инсекти ќе ви треба бленда со голема брзина за да го замрзнете движењето. Истото важи и за други живи субјекти, на пример, макро фотографии од очи. Еден од начините да го постигнете тоа е да користите и мала решетка за да можете да ја зголемите вредноста за ISO на фотоапаратот. Меѓутоа, избирањето повисока вредност за ISO може да предизвика губење на малите детали и зголемување на шумот во сликата - токму тука се потребни врвните перформанси за работа при слаба осветленост на фотоапаратите за целосна слика како EOS RP или EOS R6.

Понапредно решение од ова е да користите блиц или Speedlite. Освен тоа што го засилува осветлувањето, краткотрајното светење на блицот овозможува ефикасно замрзнување на движењата. Ако сакате најдобра контрола при фотографирањето одблиску и ефекти на осветлување без сенки при макро фотографирање, тогаш користете Macro Ring Lite MR-14EX II од Canon што е компатибилен со повеќето макро објективи од Canon.

Фокусирањето може да биде голем предизвик при фотографирање одблиску и потребна е голема прецизност, а тоа се должи на типично малата длабочина на полето. Апликацијата Canon Photo Companion содржи практични алатки што ги пресметуваат најблиската и најдалечната фокусна точка, длабочината на полето и хиперфокусното растојание во зависност од вашиот фотоапарат и поставките.

За сликите од мртва природа, како што се макро фотографиите од храна, најдобро е да го поставите фотоапаратот на статив или друга стабилна површина, за да се прицврсти на место и да се спречи поместување или заматување. За да постигнете максимална стабилност, користете го тајмерот од две секунди на фотоапаратот или далечински управувач за да не го допирате фотоапаратот кога сакате да фотографирате.

Дури и кога користите статив, можно е да предизвикате вибрации при допирање на фотоапаратот непосредно пред експозицијата, или во случај да користите DLSR-фотоапарати, вибрации може да предизвика поместувањето на огледалото. Добра комбинација на поставки што е достапна кај повеќето DSLR-фотоапарати од Canon е да користите тајмер од две секунди заедно со режимот за заклучување на огледалото. Огледалото ќе се помести две секунди пред да ја снимите сликата, што е доволно време да исчезнат вибрациите. И апликацијата Canon Camera Connect е корисна во вакви ситуации, бидејќи ви овозможува да го контролирате фотоапаратот преку телефон.

Кога фотоапаратот е прицврстен на место, автоматскиот фокус ќе функционира одлично ако користите AF во една точка и ако таа точка ја позиционирате прецизно врз делот од субјектот што сакате да биде најостар. Рачното фокусирање нуди уште подобри резултати, како што може да видите во видеозаписот погоре. Најновите фотоапарати без огледало од серијата EOS M и сите фотоапарати без огледало од серијата EOS R на Canon имаат опција за издвојување со фокусот (објективот мора да биде во режимот MF). Вклучете ја оваа опција и визирот или задниот екран ќе почне да ги означува површините што ќе доаѓаат во фокус, а тоа ќе ви овозможи детално прилагодување на вашата слика. Или, пак, користете зумиран приказ од саканата површина за да проверите дали рачното фокусирање е оптимално. Користете ја истата техника на задниот екран на DSLR-фотоапаратите од Canon со избирање на режимот за прегледување во живо.

Дури и при најпрецизно фокусирање и користење мала решетка, понекогаш нема да може да ја добиете саканата острина низ целата површина на сликата. Ова повторно се должи на многу малата длабочина на полето при фотографирање одблиску. Одредени фотоапарати од Canon, како EOS RP и EOS R6 од Canon, нудат режим за фокусирање со групирање. Тој е одличен за макро фотографирање бидејќи снима серија слики и автоматски ги менува фокусните растојанија на сите слики од серијата. Потоа, групата слики може да се спои во една слика во фазата на уредување, со што ќе добиете поширока фокусна рамнина.

Квалитетот на поголемиот дел од сликите одблиску и макро фотографиите може да се зголеми значително со малку уредување. Ако минималното фокусно растојание на вашиот објектив ве ограничува да се доближите до субјектот колку што сакате, не паничете. Креативното отсекување во фазата на уредување ќе ви овозможи да ги отстраните несакани периферни површини од сликата и да ја зачувате само саканата површина.

Ништо не може да биде потполно совршено. Кога снимате макро фотографии или фотографии одблиску, огромниот број на детали што ќе ги доловите ќе ги нагласат сите честички прашина, флеки или други неправилности. Алатката Spot Healing Brush или алатката за клонирање во софтверите за уредување слики можат ефикасно да ги маскираат овие работи, а тоа го прават со копирање на податоците за светлината, боите и текстурата од околните пиксели.

Најновите верзии на Digital Photo Professional (DPP) од Canon ја нудат и алатката Depth Compositing. Таа го автоматизира процесот за конверзија на група слики снимени во режимот за фокусирање со групирање кај фотоапаратите со системот EOS R, а потоа ги спојува во една слика. Тој е совршен за зголемување на ефикасната длабочина на полето при снимање фотографии одблиску и макро фотографии.


Се надеваме дека овие совети и техники ви покажаа колку е лесно да почнете да фотографирате макро слики и дека ве инспирираа да излезете од домот и да се потрудите да ги доловите деталите и да снимате уникатни слики одблиску.



Напишано од Matthew Richards