Фотографирањето природа не е достапно само за оние кои живеат во рурална средина. Погледнете во вашата градина, на улиците, под камењата, околу езерцата и во градските паркови и ќе пронајдете совршена прилика за фотографирање природа во градот, токму на вашиот праг.
Младиот фински фотограф Ossi Saarinen собра шестоцифрен број на следбеници на Instagram преку фотографирање природа во градот - прекрасни верверички, глувци и лисици што гледаат директно кон гледачот, како и смешни птици полни со карактер. Тука ги споделува своите најдобри совети за фотографирање природа во градот, како и најдобрите места за пронаоѓање лисици, неговите омилени подесувања за фотографирање и кадарот во кој најдобро може да се доловат уникатните субјекти од реалниот живот.
Понекогаш, во Хелсинки, Ossi наидува на животни, но со проучување на навиките на животните што сака да ги фотографира, тој знае каде и кога може да ги пронајде. „На пролет барам дувла со лисици на места што се оддалечени од центарот на градот, но сепак во близина на луѓе. Се обидувам да најдам дупки во земјата каде што може да има дувло, а потоа барам траги од крзно и нивната силна миризба“ - вели Ossi.
„Мислам дека една од најважните работи за фотографирање животни е да ги проучите навиките на животните. Ако пронајдам дувло со лисици во кое има мали лисици, знам дека тие цело време седат таму и затоа легнувам во близина и фотографирам како си играат малите лисици. Возрасните лисици шетаат во текот на ноќта, а понекогаш и попладне. Лисиците најчесто се движат по иста патека и јас ги следам за да видам каде одат, а следниот пат одам на средината од нивната патека и ги чекам да се појават“.
Преполните градски улици, патиштата со многу автомобили и звуците на цивилизацијата не се во согласност со фотографирањето природа - но тоа не значи дека не е можно, туку треба да почекате да се повлечат луѓето. „Никогаш не фотографирам на пладне“ - вели Ossi. „Многу животни се поактивни во текот на ноќта, но фотографирањето во темнина е потешко, па затоа фотографирам на изгрејсонце и зајдисонце. Светлината е подобра во тие периоди, па и фотографиите изгледаат поубаво“.
И покрај тоа што фотоапаратите за целосна слика (како што е EOS 6D од Canon) нудат подобри перформанси при високи подесувања за ISO, може да снимате одлични фотографии во природа со фотоапаратите со APS-C-сензор (како што е EOS 7D Mark II од Canon), вели Ossi. „Кога фотографирате птици и пчели, доколку не можете да се приближите доволно, помалите сензори ќе ви овозможат да ги направите да изгледаат поголеми во кадарот“, што се должи на ограниченото видно поле на помалите сензори.